Лінкі ўнівэрсальнага доступу

Навіны 18 студзеня 2000 г.


Сяржук Сокалаў-Воюш, Прага

Газэта "New York Times" аналізуе чарговую спробу расейцаў зламіць супраціў чачэнскіх незалежнікаў у Грозным. Тым часам камітэт салдацкіх маці цьвердзіць, што афіцыйныя паказчыкі стратаў расейскага войска ў Ічкерыі значна заніжаныя.

Старшыня Парлямэнцкай Асамблеі Рады Эўропы лёрд Расэл-Джонстан, які ўчора папярэдзіў расейскае кіраўніцтва пра магчымае прыпыненьне сяброўства Расеі ў гэтай арганізацыі, калі Масква ня спыніць баявыя дзеяньні ў Ічкерыі, прыехаў на Паўночны Каўказ.

Крэмаль, – піша сёньняшняя "New York Times", – які ўзнавіў наступ на Грозны, імкнецца да хуткага і рашучага захопу чачэнскае сталіцы. Каб зьменшыць супраціў незалежнікаў, расейскія авіяцыя і гарматніца ўзнавілі жорсткае масаванае бамбаваньне. Панядзелак стаўся рэкордным днём баявых налётаў на места, якое з экранаў тэлевізараў выглядала бясконцым вогнішчам з доўгімі пасмамі дыму пад самыя нябёсы.

Гэта – другі гэнеральны наступ расейцаў супраць няскораных іслямскіх паўстанцаў Грознага. Першы пачаўся ў сьнежні, але досыць хутка захлынуўся праз жорсткі супраціў і адсутнасьць паветранай падтрымкі з прычыны кепскага надвор'я. Апрача гэтага, ў бой была кінутая почасту недасьведчаная, а часам і слаба падрыхтаваная моладзь.

Чым цяперашні наступ будзе адрозьнівацца ад папярэдняга? Прадстаўнік расейскага вайсковага кіраўніцтва гэнерал-лейтэнант Трошын паабяцаў "радыкальныя зьмены" ў стратэгіі. Выглядае, піша "New York Times", што гэтым разам расейцы ўжывуць усю сваю агнявую магутнасьць, не зважаючы на наяўнасьць у Грозным прыблізна 40 тысячаў чалавек мірнага насельніцтва.

У часе папярэдняй вайны 94-96 гадоў, – піша сёньняшняя "Los Angeles Times", – загінула 80 тысячаў чалавек, пераважная бальшыня якіх былі невайсковыя людзі. Колькі жыцьцяў забрала гэтая вайна – невядома. Але паводле афіцыйных зьвестак расейскага вайсковага кіраўніцтва, на канец мінулага тыдня ў шэрагах расейцаў загінуў 741 чалавек і 2.233 былі параненыя. Тады ж газэта "Комсомольская правда" паводле сваіх крыніцаў, ацаніла страты ў 1300 забітых і 5.000 параненых. І вось цяпер Камітэт салдацкіх маці на падставе сабраных ім зьвестак заявіў, што колькасьць забітых расейскіх вайскоўцаў у Ічкерыі трэба ацэньваць у межах ад 3 000 да 3.500 тысячаў чалавек, а колькасьць параненых ад 5 да 6 тысячаў.

"Чалавечае жыцьцё ў расейскіх узброеных сілах ня мае аніякай вартасьці, – падае словы былога 20-гадовага артылерыста Бурнаева сёньняшняя "Los Angeles Times". – Для вышэйшага вайсковага кіраўніцтва страціць жаўнера тое самае, што выкінуць скарыстаны аўтобусны квіток".

Тым часам погляды расейскае прэсы зьвернутыя на візыт Старшыні Парлямэнцкай Асамблеі Рады Эўропы лёрда Расэл-Джонстана ў Маскву і Паўночна-Каўкаскі рэгіён. "Міжнародная ізаляцыя Расеі ў выніку чачэнскай вайны, рэальная як ніколі", – лічыць газэта "Сегодня". "Сур'ёзнасьць сытуацыі пацьвярджаецца тым, што выканальнік абавязкаў расейскага прэзыдэнта Пуцін тры гадзіны, замест плянаванай адной, пэрсанальна пераконваў Старшыню Парлямэнцкай Асамблеі ў тым, што пазыцыя Расеі ў Чачні – слушная".

"Візыт у Маскву і на Паўночны Каўказ старшыні Парлямэнцкай Асамблеі вельмі істотны. Лёрд Расэл-Джонстан можа рэальна адчуць, што гуманітарная сытуацыя ў рэгіёне – далёкая ад катастрафічнай, – пішуць "Известия". – Што ж тычыцца ракетаў і бомбаў, то гэта і наагул – лятарэя: могуць трапіць, а могуць і ня трапіць. Галоўнае, з чыйго боку разглядаць траекторыю іхнага палёту".

Тым часам сам лёрд Расэл-Джонстан ужо сустрэўся са старшынём Дзяржаўнае Рады Дагэстану Магамэдалі Магамэдавым, пасьля чаго на пытаньне журналістаў, на колькі пасьля гэтай паездкі можа зьмяніцца пазыцыя Рады Эўропы ў дачыненьні да сытуацыі на Паўночным Каўказе, адказаў, што пазыцыя наўрад ці зьменіцца, але ўсё трэба ўбачыць на ўласныя вочы.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG