«На сёньня нам вядомыя імёны прынамсі 16 рымска-каталіцкіх, 12 пратэстанцкіх, 11 праваслаўных і 6 грэка-каталіцкіх сьвятароў, якія зазналі перасьлед з 2020 году. Яны былі затрыманыя, зьняволеныя, аштрафаваныя, ім пагражалі. Многія сталі уцекачамі», — адзначыла дэмакратычная лідэрка Беларусі падчас выступу.
Яна нагадала гісторыю сям’і Разановічаў:
«Праваслаўны сьвятар Сяргей Разановіч, яго жонка Любоў і іхны сын Павал былі арыштаваныя як „тэрарысты“ за тое, што далі схованку актывісту апазыцыі Мікалаю Аўтуховічу. Усе трое зазналі маральныя і фізычныя катаваньні ад сілавікоў. 58-гадовую Любоў прызналі „асабліва небясьпечнай“ і пакаралі 15 гадамі пазбаўленьня волі. Яе мужу далі 16, а сыну — 19 гадоў пазбаўленьня волі адпаведна».
З словаў Ціханоўскай, вернікі ў Беларусі патрабуюць дапамогі сваіх хрысьціянскіх братоў і сясьцёр з Эўропы і ўсяго сьвету.
«Міжнародная рэлігійная супольнасьць можа шмат зрабіць для іх. Патрабаваць доступу зьняволеных да багаслужбаў, агітаваць за іх вызваленьне, арганізоўваць паломніцтвы і малебны за Беларусь, падтрымліваць беларускіх хрысьціян за мяжой, заклікаць да дыялёгу лідэраў беларускіх цэркваў — усё гэта мае рэальнае значэньне для беларусаў», — лічыць Ціханоўская.
Яна нагадала, што ў краіне каля 1,5 тысяч грамадзян, якіх праваабаронцы прызналі палітзьняволенымі, аднак «рэальная колькасьць палітычных вязьняў ацэньваецца прыкладна ў 4 тысячы чалавек», а «ў сярэднім штодня арыштоўваюць 10 чалавек».
Дэмакратычная лідэрка выказала шкадаваньне, што «ніводная зь беларускіх цэркваў не ўваходзіць у Канфэрэнцыю эўрапейскіх цэркваў».
«Магчыма, настаў час паспрабаваць гэта зьмяніць. Бо Беларусь — гэта Эўропа. А хрысьціянства — неадʼемная частка нашай ідэнтычнасьці», — сказала Ціханоўская.
- Канфэрэнцыя эўрапейскіх цэркваў заснаваная ў 1959 годзе. Абʼядноўвае 113 праваслаўных, пратэстанцкіх і англіканскіх цэркваў.
