Як паведаміў сайт кіраўніка канадзкага ўраду, Джастын Трудо асудзіў утрыманьне пад вартай палітычных зьняволеных рэжымам Лукашэнкі, бесьперапынныя нападкі на свабоду прэсы і адзначыў пастаянныя намаганьні Сьвятланы Ціханоўскай у барацьбе за правы беларускага народу і захаваньне правоў чалавека.
Прэм’ер-міністар асабліва адзначыў санкцыі ў дачыненьні 21 чалавека, аб якіх Канада аб’явіла 15 красавіка ў адказ на парушэньні правоў чалавека ў Беларусі пасьля фальсыфікацыі прэзыдэнцкіх выбараў 2020 году.
Палітык зьвярнулася з просьбай запрасіць дэмакратычныя сілы Беларусі на саміт Вялікай сямёркі ў 2025 годзе, калі Канада будзе старшыняваць у G7, а таксама аказаць дэмакратычным сілам падтрымку ў ААН і АБСЭ.
Трудо і Ціханоўская асудзілі падтрымку рэжымам Лукашэнкі вайны Расеі супраць Украіны, уключаючы паведамленьні аб саўдзеле рэжыму ў выкраданьні Расеяй украінскіх дзяцей. Бакі выказалі надзею на працяг супрацоўніцтва ў падтрымку правоў і спадзяваньняў народа Беларусі, гаворыцца ў паведамленьні.
Як паведаміў «Позірку» галоўны дарадца Ціханоўскай Франак Вячорка, Ціханоўская заклікала Канаду да «больш шчыльнага супрацоўніцтва» з Аб’яднаным пераходным кабінэтам, абмеркавала пытаньне закрыцьця шчылін для абыходу санкцый, спробы беларускага рэжыму дамагчыся зьняцьця санкцыя на пастаўкі калійных угнаеньняў.
Акрамя таго, Ціханоўская папрасіла Трудо «зьвярнуць увагу на вытворчасьць зброі і яе кампанэнтаў на тэрыторыі Беларусі, якія паступаюць на ўзбраеньне расейскай арміі», канстатавала пагрозу беларускаму сувэрэнітэту з боку Масквы.
Ціханоўская сустрэлася са сьпікерамі Палаты прадстаўнікоў і Сэнату Канады
У Парлямэнце Канады Сьвятлана Ціханоўская сустрэлася са сьпікерамі, лідэрам групы За дэмакратычную Беларусь, а таксама лідэрамі апазыцыі, паведаміла яе прэсавая служба.
Ціханоўская выказала ўдзячнасьць за салідарнасьць, а таксама адзначыла, што пытаньне Беларусі аб'ядноўвае розныя палітычныя сілы ў парлямэнце: і ўрадавую партыю, і апазыцыю.
Кіраўніцтва Парлямэнту Канады выказала салідарнасьць і падтрымку дэмакратычным сілам і грамадзянскай супольнасьці і паабяцала працягваць падтрымку беларусам.
Падчас сустрэч абмеркавалі ваенна-палітычную сытуацыю ўнутры краіны, сытуацыю з палітвязьнямі, санкцыі і падтрымку для рэпрэсаваных і незалежных мэдыяў, прыцягньне рэжыму Лукашэнкі да адказнасьці, а таксама праблемы беларускай дыяспары ў Канадзе.
Таксама Ціханоўская прасіла парлямэнтароў падтрымаць Беларусь у парлямэнцкіх асамблеях АБСЭ і NATO.
Хто такая Сьвятлана Ціханоўская
Сьвятлана Ціханоўская — беларускі палітык, былая кандыдатка ў прэзыдэнты Беларусі. Цяпер знаходзіцца ў Літве.
- Сьвятлана Ціханоўская нарадзілася ў 1982 годзе ў Мікашэвічах (Берасьцейская вобласьць).
- 15 траўня 2020 году пасьля адмовы Цэнтральнай выбарчай камісіі зарэгістраваць мужа Сьвятланы, зьняволенага лідэра кампаніі «Страна для жизни» блогера Сяргея Ціханоўскага, Сьвятлана ад свайго імя падала дакумэнты на рэгістрацыю ініцыятыўнай групы. 20 траўня яе групу зарэгістравалі. 29 траўня кіраўніка яе выбарчага штабу Сяргея арыштавалі зноў.
- Кандыдаткай у прэзыдэнты Ціханоўскую зарэгістравалі 14 ліпеня 2020.
- Пасьля арышту прэтэндэнта на пасаду прэзыдэнта Віктара Бабарыкі і ўцёкаў за мяжу яшчэ аднаго прэтэндэнта Валера Цапкалы іх штабы аб’ядналіся з штабам Сьвятланы Ціханоўскай. Аб’яднаны штаб правёў пасьпяховую выбарчую кампанію з шматтысячнымі мітынгамі ў вялікіх і малых гарадах Беларусі пад бел-чырвона-белымі сьцягамі.
- Паводле афіцыйных зьвестак ЦВК, на выбарах Сьвятлана Ціханоўская набрала 10,09%, а Аляксандар Лукашэнка — 80,08%. Ціханоўская адмовілася прызнаць гэтыя вынікі і 10 жніўня асабіста накіравалася ў ЦВК, каб іх абскардзіць.
- З ЦВК палітык не вярнулася. Сувязь зь ёю зьнікла, празь некалькі гадзін у вэстыбюлі ЦВК яна паведаміла, што «прыняла рашэньне» і зьехала ў невядомым кірунку. 11 жніўня стала вядома, што яна ў Літве. Былі апублікаваныя два відэазвароты Ціханоўскай, адзін зь якіх быў запісаны ў ЦВК пасьля размовы з двума высокапастаўленымі сілавікамі, у ім Ціханоўская заклікае дэманстрантаў не выходзіць на вуліцы. Кіраўніцтва Літвы 11 жніўня заявіла, што звароты Ціханоўская запісала пад ціскам і шантажом.
- Празь некалькі дзён пасьля фактычнай «дэпартацыі» ў Літву Сьвятлана Ціханоўская заявіла, што бярэ на сябе ролю «нацыянальнага лідэра».
- 18 жніўня з ініцыятывы Сьвятланы Ціханоўскай у Беларусі была створаная Каардынацыйная рада для транзыту ўлады.
- 10 верасьня 2020 Сэйм Літвы прагаласаваў за прызнаньне Сьвятланы Ціханоўскай абраным кіраўніком Беларусі.
- Ад верасьня 2020 году Ціханоўская наведала з працоўнымі візытамі дзясяткі краін сьвету і сустрэлася зь іх лідэрамі. Сярод іх прэзыдэнт Францыі Эманюэль Макрон, канцлер Нямеччыны Ангела Мэркель, высокі прадстаўнік ЭЗ Жузэп Бурэль, прэзыдэнт ЗША Джо Байдэн ды інш.
- Сьвятлана Ціханоўская кантактавала з актыўнымі людзьмі ў Беларусі падчас пратэстаў 2020 і 2021 гадоў, прызначыла сваіх прадстаўнікоў для падтрыманьня лучнасьці з сацыяльнымі і прафэсійнымі групамі ў краіне.
- Ціханоўская выступіла за правядзеньне ў Беларусі новых празрыстых прэзыдэнцкіх выбараў пры міжнародным кантролі і актыўна заклікала міжнародную супольнасьць да ўдзелу ў арганізацыі перамоваў зь цяперашнім кіраўніцтвам Беларусі.
- За два гады Ціханоўская, яе штаб і зьвязаныя з ёй ініцыятывы дапамагалі палітвязьням, выступалі з шэрагам гуманітарных і палітычных ініцыятываў.
- Яна выступала супраць сфальшаванага канстытуцыйнага рэфэрэндуму, ініцыяванага Лукашэнкам у 2022 годзе.
- У лютым 2022 Ціханоўская асудзіла расейскую агрэсію супраць Украіны і саўдзел у ёй рэжыму А. Лукашэнкі, у сакавіку 2022 году стварыла беларускі Антываенны рух.
- У красавіку 2022 году Ціханоўская на канфэрэнцыі Рады Бясьпекі ААН заявіла, што «поўдзень Беларусі фактычна знаходзіцца пад расейскай акупацыяй».
- Ціханоўская правяла пасьпяховыя перамовы з урадам Польшчы і дамаглася асаблівых умоваў для прыезду і легалізацыі беларусаў, ня згодных з рэжымам Лукашэнкі.
- У жніўні 2022 году Сьвятлана Ціханоўская стварыла Аб’яднаны пераходны кабінэт, назвала чатырох сваіх прадстаўнікоў.
- У лістападзе 2022 Ціханоўская ўпершыню назвала сябе прэзыдэнтам-электам
